í fréttum er þetta helst..

... ég hef engan tíma til þess að skrifa reglulega hér inn. Finnst samt einhvern vegin vænt um þessa síðu og langar ekki að hún sofni svefninum langa. Ég hef lúmskt gaman að því að blaða í gegnum færslur sem skrifaðar voru fyrir jafnvel þremur árum síðan.

Síðustu mánuðir hafa verið virkilega viðburðaríkir og gefandi.

Red Apple Apartments stækkar og blómstrar sem aldrei fyrr. Samt er það ennþá minnsta barnið okkar og þarf okkar athygli og vinnusemi nótt sem nýtan dag. Við vinnum mikið hjónin og ekki líður það kvöld eða helgi að ekki er setið við tölvuna. Samt er þetta allt öðruvísi vinnuálag en ég hef nokkru sinni kynnst. Þetta er svakalega krefjandi og sérstaklega eftir að við réðum starfsfólk en á sama tíma svo skemmtilegt og gefandi. Auðvitað verðum við stundum þreytt en það líður nú fljótt hjá. Við stækkum hægt og rólega og nú nýlega opnuðum við London, Malmö og Madrid opna einni á næstu vikum.

Hin börnin tvö þrífast vel. Nói hefur verið á Íslandi núna í mánuð hjá mömmu sinni. Ragnheiður Birna dafnar vel og byrjar í skóla í haust. Hún hefur mestan áhuga á bumbubúanum þessa dagana og talar vart um annað en systa þetta og systa hitt (jebb kúlubúin er stelpa).

Meðgangan gengur vel. Ég er komin 28 vikur og settur dagur er 11. október. Ætli hún komi ekki á afmæli móður sinnar, 9 okt. Það væri nú besta afmælisgjöfin. Við erum búin að fara í tvisvar í ítarlegam hjarasónar hjá hjartalækni og allt leit vel út. Engar líkur á því að hún sé með sama hjartagalla og RB og mjög litlar líkur á því að hennar hjarta sé ekki fullkomlega heilbrigt. Mér líður vel og næ að vinna fulla vinnu og njóta síðasta Kjammasumarsins okkar.

Já já það er ákveðið að við flytjum héðan af kjammanum í Janúarlok. Við stefnum að því að fara til Spánar í um 6 mánuði, vonandi aftur nálægt Barcelona, okkur líkaði svo vel þar. Við munum síðan bara sjá til hvað við gerum eftir það. Red Apple er með aðalskrifstofur sínar í Lundi þannig að það er ekkert ólíklegt að við komum hingað aftur en það er alls óráðið. Þessar breytingar eru allar á undirbúningsstigi og því best að segja sem minnst að svo stöddu.

Sumarið hefur verið einstaklega notalegt, hingað til. RB fór til Íslands í rúmar tvær vikur. Á meðan fóru foreldrarnir í ástarferð um Evrópu. Við keyrðum til Þýskalands, Belgíu, Hollands, Frakklands, Luxemborg og svo aftur í gengum Þýskaland á leið heim. Þessi ferð verð yndisleg í alla staði. Að vísu þurftum við að koma aðeins fyrr heim en planað var vegna vinnu, en það var nú allt í góðu lagi. Einnig erum við búin að vera með góða gesti. Mamma og Logi komu til okkar í 5 daga. Við lékum okkur saman í yndislegu veðri og fögnuðum útskrift Didda úr byggingartæknifræðingum. Yndislegur tími.

Já síðast en ekki síst þá gengur 'hobbýið' mitt bara vel. Ekki vita kannski allir að ég fékk mér hobbý í vetur, það sem það var svo rólegt að gera hjá mér :) Ég og vinur minn erum að stofna lítið sérhæft fyrirtæki sem framleiðir snilldarhluti. Ekki get ég sagt núna hvað fyrirtækið gerir en ég mun geta sagt það eftir nokkrar vikur til viðbótar. Fylgist spennt með...

Sem sagt bara gaman að vera til og ég ætla mér að njóta hvers andartaks.

Knús elsku vinir hvar sem þið eruð

Nýgift í Brussel.

Nú er þau hjón..

...og kyssast upp á títuprjón

Viltu?kynslóðin.

Hvers vegna erum við alltaf að bjóða börnum val þegar þau hafa ekki vald né þroska til þess að velja? Við Heiðrún systir sátum hér í elhúsinu hennar mömmu um daginn og áttum gott spjall um allt og ekkert. Tal okkar barst að barnauppeldi. Mér er ansi hugleikið hvernig uppeldi þróaðist frá því að börn gerðu eins og fullorðið fólk sagði þeim að gera yfir í það að fullorðið fólk er sífellt að spyrja börn hvað þau vilji gera.

Ég kalla þessi börn Viltu?kynslóðina.

Hvers vegna eru foreldrar að spyrja börn, viltu koma að sofa? Viltu koma að borða? Viltu ekki taka til í herberginu þínu? Þetta eru allt athafnir sem börn hafa ekki val hvort þau taka þátt í, foreldrarnir hafa þegar ákveðið að það sé matartími en einhvernvegin þora ekki að segja komdu að borða heldur setja hlutina fram eins og barnið hafi val, sem það í raun hefur ekki.

Eru börn betur sett trúandi því að þau hafi val með allt? Er ekki bara hollt að sætta sig við frá unga aldri að sumt hefur maður ekki val um heldur þarf bara að gera?

Síðan þegar barnið hefur raunverulegt val í aðstæðum eins og hvort viltu fara í sund eða leikfimi? hefur það á tilfinningu að það skipti ekki máli hverju það svarar það sé hvort er bara stundum á það hlustað.

Smá uppeldispælingar frá eldhúsborði mömmu.....

Elsku Pabbi minn

Elsku besti Pabbi,

Í dag er ár síðan við fengum þær hræðilegu fréttir að þú hefðir látist í slysi. Enn þann dag í dag skil ég ekki hvað gerðist og hvernig þetta gat gerst. Ég mun aldrei skilja það, ég verð bara að læra að lifa með því og sætta mig við það sem ég fæ ekki breytt.

Í dag fórum við upp að slystað og áttum þar minningarstund, þar var kveikt á kertum og fólk lagði blóm á vörðuna. Fjallið var snóþakið eins og á slysdaginn fyrir ári síðan og himnarnir grétu þunnum tárum. Í kvöld mun fjallið hágráta enda spáð blindbyl.

Hvern einasta dag og hverja einustu mínútu finn ég til söknuðar og hugsa svo oft ,bara ef.... Í dag hef ég hugsað sérstaklega oft bara ef.... Það er sárt að sakna vegna þess hversu heitt maður hefur elskað og verið elskaður. Ég finn fyrir ást þinni alla daga og veit að mér ber skylda til þess að virða mátt kærleikans og lifa lífinu hvern einasta dag, einn dag í einu.

Ég óska þess að þú sért umvafin æðruleysi og kærleika á þeim stað sem þú ert núna. Við hittumst á ný þegar minn tími kemur.

Elska þig og sakna

Þín Sessa

Hvernig er hægt að versla inn á svona verði?

Verðlagið á Íslandi er komið út í algjört rugl. Hvernig er hægt að ná endum saman með svona verðlag.

Ég keypti mér í gær fallegan peysukjól á www.ellos.se ætlaði síðan að sýna mínum ekta manni árangur þess að hann var í burtu í allt gærkveldi. Í spenningnum sló ég óvart inn www.ellos.is sem er íslenska útgáfan af þessum ágæta pöntunarlista. Ég er búin að vera í sjokki síðan. Verðið er bilun á Íslensku útgáfunni og svona allt í lagi á þeirri sænsku. Sami gallajakkinn kostar t.d. 4000 isl kr meira á Íslandi heldur en í Svíþjóð. Sama flíkin! Þetta er bilun.

Ég veit bara að ég ætti ekki gott með að kaupa mér gallajakka eða peysukjól á Íslandi í dag.

Játning...

... ég er ástfangin...

Bóka fund

Ég og dóttirin vorum að keyra heim frá ljósameðferðinni í morgun. Þá segir þessi elska mér að hún hafi komið með fullt af myndum og föndri heim úr leikskólanum í gær. Ég tjáði henni að ég hefði ekki haft tíma í að skoða þær þar sem ég hefði átt fund í gærkveldi.

Sú stutta var fljót að svara " nú þá verðum við bara að eiga saman fund í dag". Jebb hún var að bóka fund með mömmu sinni. "Á fundinum þurfum við að fara yfir teikningarnar og bókina um líkamann". Jebb sú stutta var líka búin að ákveða efnistök fundarins.

Ég er sem sagt að fara heimúr vinnu eftir nokkra tíma á mikilvægasta fund dagsins!